Íslenskir neytendur bjartsýnir

Órói á fjármálamörkuðum undanfarnar vikur virðist ekki slá á bjartsýni íslenskra neytenda. Þeir telja núverandi ástand í efnahags- og atvinnumálum afar gott, en eru nokkru svartsýnni á horfur að sex mánuðum liðnum. Þetta er meðal þess sem lesa má úr Væntingavísitölu Gallup sem birt var í morgun.

Vísitalan fyrir ágúst mælist 126,3 stig og hækkar milli mánaða um hálft annað stig. Vísitala fyrir mat á núverandi ástandi mælist 172,4 stig, og hefur aðeins einu sinni verið hærri. Vísitala fyrir væntingar til sex mánaða er hins vegar mun lægri og mælist 95,6 stig, en vísitölugildi undir 100 þýðir að fleiri svara neikvætt en jákvætt. Munur á mati á núverandi ástandi og væntingum til sex mánaða hefur aukist hratt undanfarna mánuði.

Fylgni krónu við Væntingavísitölu minnkar

Greiningadeild Glitnis segir að sterk fylgni hafi verið undanfarin misseri milli þróunar Væntingavísitölu og gengis krónu. Til að mynda hafi slegið mjög á væntingar neytenda í kjölfar gengisfalls krónu á vormánuðum í fyrra. Samfara hækkandi gengi hafi neytendur svo tekið gleði sína á ný með haustinu á síðasta ári. Hins vegar hafi þróun síðustu mánaða gengið þvert gegn þessu sambandi. Þannig hafi Væntingavísitalan lækkað talsvert í júlí samfara styrkingu krónunnar, en á hinn bóginn virðist gengisfall krónu, sem var hvað hraðast á þeim tíma sem mælingar Gallup stóðu yfir, ekki hafa haft mikil áhrif á svör neytenda í ágúst.

 

 

Minni bjartsýni í haust

 

Greiningadeild Glitnis segir jafnframt að sterkt samband sé milli Væntingavísitölu og einkaneyslu. Þróun vísitölunnar styðji við þá skoðun að einkaneysla hafi verið lífleg á vor- og sumarmánuðum. Órói á fjármálamörkuðum kunni þó enn að eiga eftir að segja til sín í minnkandi bjartsýni neytenda, og einnig kunni minnkandi kaupmáttur og þrengri skilyrði til lánsfjármögnunar að segja til sín og draga úr væntingum almennings þegar á haustið líði.