Ríkisstjórnarskipti á Bessastöðum á morgun

Ákveðið hefur verið að ríkisráðsfundir fari fram á Bessastöðum á morgun klukkan hálfellefu og tvö. Á fyrri fundinum kemur gamla ríkisstjórnin saman, ríkisstjórn Sjálfstæðisflokks og Framsóknarflokks, ásamt Ólafi Ragnari Grímssyni og þá láta ráðherrar Framsóknarflokks og Sturla Böðvarsson samgönguráðherra Sjálfstæðisflokksins af embætti. Alþingi kemur saman í næstu viku.

Að fundinum loknum býður forseti ráðherrum og mökum þeirra til hádegisverðar á Bessastöðum. Á síðari ríkisráðsfundinum veitir forseti svo nýrri ríkisstjórn umboð en í henni eru sjö nýir ráðherrar, sex úr Samfylkingunni og einn úr Sjálfstæðisflokknum.

Eins og fram kom í fréttum var stefnuyfirlýsing nýrrar ríkisstjórnar kynnt í dag, 23. maí, en svo skemmtilega vill til að stefnuyfirlýsing Sjálfstæðisflokksins og Framsóknarflokksins eftir síðustu kosningar var birt fyrir nákvæmlega fjórum árum, 23. maí 2003.

Alþingi mun svo koma saman þann 31. maí næstkomandi.