SAMFYLKING Í SÁRUM

Lungann úr kjörtímabilinu hefur verið skondið að fylgjast með vængstýfðri Samfylkingunni flögra úr einu gaukshreiðrinu í annað í leit að rampa til að hefja sig til flugs af. Allt hefur komið fyrir ekki og síðustu mánuði hafa magalendingarnar orðið æ harkalegri eftir því sem fjöðrunum hefur fækkað í þessum stefnulausu flugtakstilburðum.

Í von um að geta skreytt flokkinn með lánuðum fjöðrum bauð formaðurinn skandinavískum stallsystrum sínum, sænsku Mona Sahlin og dönsku Helle Thorning, formönnum “systurflokkanna”, á landsfund litlu systur á Íslandi.

Mona þessi Sahlin gengdi tvíþættu hlutverki á samkundunni. Hún lagði línurnar en var um leið holdgervingur vítis til varnaðar því hún býr yfir þeirri reynslu að hafa orðið að segja af sér ráðherradómi vegna spillingarmála.

Það kom á daginn að í málaefnalegu tilliti reyndist hvorug kratakynsystirin skarta fjöðrum sem brúklegar væru til að hressa uppá hina pólitísku ímynd gestgjafans og koma honum á flug í kosningabaráttunni. Þvert á móti kom Mona þessi litlu systur endanlega niður á jörðina þegar hún í hreinskilningslegu gáleysi kom eftirfarandi skilaboðum til íslenskra kjósenda í sjónvarpsviðtali (í lauslegri þýðingu): “Hinn almenni skattgreiðandi þarf að læra að meta háa skatta því að eftir því sem þeir eru hærri þeim mun meira hefur ríkissjóður úr að moða fyrir samfélagið”.

Það ber að þakka Monu Sahlin fyrir að hafa alsberað með jafn hispurslausum hætti kjarnann í hinni skandinavísku sósíaldemokratísku kennisetningu frammi fyrir alþjóð. Hinn íslenski launþegi þarf nú ekki lengur að velkjast í vafa um hvaða krumla muni leika lausum hala í buddu hans ef Samfylkingin verður leiðandi afl í ríkisstjórn.

Svo bregðast krosstré sem önnur tré. Sá sem nefndur hefur verið guðfaðir samfylkingarinnar (JBH) gaf nýverið út dánarvottorð á Samfylkingartilraunina enda orðið dagljóst að hana hefur dagað uppi í nafnbreytingu einni saman. Fyrrum prelátar Alþýðuflokksins sáluga róa nú lífróður á síðum blaðanna að sminka líkið og velja þokkafull líkklæði svo það eigi einhverja möguleika á stjórnarmyndunarballinu þegar boðið verður uppí dans.

Hver minningargreinin rekur aðra um hinn sáluga Alþýðuflokk þar sem hástemmt og mærðarlegt oflofið fer úr böndum þannig að úr verður sögufölsun. Þannig er t.d. rætt um útfærslu fiskveiðilögsögunnar án þess að minnast á útfærsluna úr 50 sjómílum í 200 bara vegna þess að A-flokkarnir svokölluðu komu þar hvergi nærri.

Meginástæðan fyrir þenslunni er ekki nema að litlu leyti stóriðjuframkvæmdunum fyrir austan um að kenna. Innrás bankanna inná húsnæðismarkaðinn er höfuð ástæðan.

SBV tapaði kærumáli fyrir Evrópudómstól sem féllst ekki á þau rök að Íbúðalánasjóður væri í ólöglegri samkeppni við bankana.Viðbrögð KB-Banka urðu þau að ryðjast inná markaðinn með snarpri sókn í viðleitni sinni til að leggja Íbl-sjóð á hliðina að því er virtist. Hinir bankarnir fylgdu í kjölfarið. Hið nýfengna frelsi fór þarna úr böndum en stjórnendur á þeim bæjum haf nú séð að sér.

Formaður hins afturgengna Alþýðuflokks sér hins vegar ekki að sér og grefur undan íslensku krónuni með því að úthrópa hana ónýta.

Samfylkingin er eini flokkurinn sem hefur lýst því yfir að hann vilji leggja niður Reykjavíkurflugvöll þó svo niðurstaðan yrði sú að flytja þyrfti innanlandsflugið til Keflavíkur.

Skoðanakannanir meðal Reykvíkinga sýna að langflestir vilja halda flugvellinum á sínum stað og þeir gera sér auðvitað grein fyrir að flugvöllurinn í Vatnsmýrinni er eina alvöru almenningssamgöngutæki Reykvíkinga.

Prelátar hins afturgengna Alþýðuflokks klifa sífellt á því að innganga Íslands í Evrópusambandið sé óhjákvæmileg ásamt upptöku evru. Sviss sem er í miðri Evrópu og eitt allra mesta velmegunarríki heims afsannar kirfilega krata-kenninguna enda er Sviss ekki í ES.

Norðmenn og Íslendingar hafa líka afsannað kenninguna kirfilega enda í 1.og 2. sæti á lista Sameinuðu þjóðanna þar sem ríkjum heims er raðað eftir lífskjörum.

Daníel Sigurðsson

Sjálfstætt starfandi véltæknifræðingur.