Hnífstungumaður í fimm vikna gæsluvarðhald

Karlmaður á fimmtugsaldri var úrskurðaður í fimm vikna gæsluvarðhald í dag fyrir að veita öðrum karlmanni lífshættulega áverka með hnífi í Reykjavík í gærkvöldi. Hann hefur játað verknaðinn. Maðurinn sem var stunginn fór í aðgerð í nótt og er haldið sofandi í öndunarvél.

Atvikið átti sér stað þar sem fimm menn sátu að sumbli í heimahúsi í höfuðborginni. Einn þeirra brá sér fram í eldhús, sótti hníf og stakk manninn án frekari orðalenginga.

Hinir mennirnir hringdu þegar á lögreglu, sem sendi menn með hlífðarbúnað á vettvang, þar sem ekki lá fyrir hvort æðið væri runnið af árásarmanninum.

Maðurinn, sem var stunginn, var fluttur í skyndingu á slysadeild þar sem læknum tókst að stöðva blæðingar, en hann hafði misst mikið blóð þegar þangað var komið. Líðan hans er þannig að hann er að líkindum úr lífshættu. Mennirnir fjórir voru handteknir og gista fangageymslur. Einn þeirra hefur þegar viðurkennt verknaðinn en tildrög eru óljós. Þeir verða yfirheyrðir í dag.