Hafnfirðingum fjölgaði með eðlilegum hætti

Það er úr lausu lofti gripið að Hafnfirðingum hafi fjölgað um 700 manns fyrir kosningar um stækkun álversins síðastliðinn laugardag. Lúðvík Geirsson, bæjarstjóri í Hafnarfirði, segir fjölgun bæjarbúa hafa verið með eðlilegum hætti undanfarna mánuði. Viðtalið við Lúðvík fylgir fréttinni.

Við sögðum frá því í fréttum okkar í gærkvöldi að talsmaður Hags Hafnarfjarðar, sem beitti sér fyrir stækkun álversins í Straumsvík, grunaði að stórfellt kosningasvindl hefði átt sér stað í kring um kosningarnar.

Hann sagði að grunur léki á að allt að 700 manns hefðu flutt lögheimili sitt í bæinn til að greiða atkvæði gegn stækuninni. Þessu hafnar Lúðvík Geirsson, bæjarstjóri í Hafnarfirði.

Hafnfirðingum fjölgaði um 5,3 prósent í fyrra og segir Lúðvík að áfram hafi verið reiknað með mikilli fjölgun í bænum.