Portlandi lagði Kiel með tveggja marka mun

Portland San Antonio frá Spáni lagði Þýskalandsmeistara Kiel af velli, 30-28, í fyrri viðureign liðanna í undanúrslitum Meistaradeildar Evrópu í handbolta. Ólíkegt verður að teljast að forskot Portland dugi til að komast í úrslit keppninnar, enda Kiel nánast ósigrandi á heimavelli sínum.

Leikurinn í dag var mjög sveiflukenndur. Gestirnir frá Kiel byrjuðu mun betur og náðu heimamenn ekki að skora sitt fyrsta mark í leiknum fyrr en eftir tæplega sjö mínútur. Kiel hafði forystu framan af fyrri hálfleik og komst meðal annars í 9-6 en Portland náði að minnka muninn í eitt mark fyrir hálfleik, 19-18.

Í síðari hálfleik komst Portland fljótlega yfir, 21-19, en Kiel gafst aldrei upp og missti heimamenn aldrei of langt frá sér. Lokatölur urðu 30-28 eins og áður segir, og mega leikmenn Kiel vera sáttir með þau úrslit.

Franski markvörðurinn Thierry Omeyer var besti maður vallarins í dag en hann varði alls 25 skot, mörg hver úr algjörum dauðafærum. Að auki varði hann fjögur vítaskot.