Áhugi að auka stofnfé SPM

Áhugi er fyrir hendi hjá Borgarbyggð að auka stofnfé Sparisjóðs Mýrasýslu (SPM) en sveitarfélagið er eini stofnfjáreigandi sparisjóðsins.

„Það hefur verið til skoðunar hjá sveitar­félaginu að auka stofnfé. Við erum ekki búin að ákveða hve mikið en við værum að tala um verulega aukningu á stofnfé, einhvers staðar á bilinu 250-350 milljónir króna,“ segir Páll S. Brynjarsson, sveitarstjóri Borgarbyggðar, og býst við að ákvörðun liggi fyrir í haust. Stofnfé sparisjóðsins er aðeins um fjórar milljónir króna en eigið fé rúmir 3,5 milljarðar.

Páll segir að málið hafi verið reifað við stjórnendur sparisjóðsins sem hafa tekið vel í hugmyndina. Sveitarfélagið ætti þar með kost á að fá eðlilegri arð af eign sinni og eigið fé sparisjóðsins myndi styrkjast með þessari aðgerð.

Aðspurður segir Páll að það hafi ekki komið til tals að opna eignarhald að SPM.