Njarðvík vann Snæfell í toppslagnum

Njarðvík heldur sínu striki í Iceland Express-deild karla í körfubolta og í toppslag kvöldsins vann liðið góðan sigur á Snæfelli, 77-67, í ljónagryfjunni í Reykjanesbæ. KR og Skallagrímur unnu einnig leiki sína í kvöld og eru skammt undan Njarðvíkingum í toppbaráttunni.

KR átti ekki í vandræðum með Þór á Þorlákshöfn þar sem lokatölur urðu 110-80. Skallagrímur vann góðan útisigur á Tindastól á Sauðárkróki, 110-94, og þá unnu Haukar sigur á Fjölni í sannkölluðum botnslag, 78-72.

Njarðvík er nú komið með 30 stig á toppi deildarinnar en KR er í 2. sæti með 28 stig. Skallagrímur er með 26 stig en Snæfell 24 stig. Í fimmta sæti kemur síðan Keflavík með 20 stig.

Í Iceland Express-deild kvenna fór fram einn leikur í kvöld. Íslandsmeistarar Hauka lögðu ÍS af velli í Hafnarfirðinum, 68-62. Haukastúlkur eru sem fyrr á toppi deildarinnar.