Mundi ekki eftir framlengingunni

Markvörðurinn sterki Kasper Hvidt var bæði raunsær og afar glaður eftir sigurinn á Íslendingum. „Þetta var alveg frábært. Mann langar bara að fara á handahlaupum um salinn, þetta var svo mikil snilld", sagði Hvidt í samtali við TV2.

„Það má segja að vörnin okkar hafi ráðið illa við sóknina hjá Íslendingunum, þeir áttu alltaf mótleik sama hvað við gerðum. Þessu verðum við að vinna í fyrir næsta leik. Við verðum að ná jafnvægi milli sóknar og varnar. Fyrst við erum komnir svona langt er engin leið að fara", sagði Hvidt að lokum.+

Félagi hans Lars Jorgensen var ekki alveg kominn niður á jörðina þegar fréttamaður TV2 náði tali af honum og sagðist muna frekar lítið hvað hefði gerst í framlengingunni.

"Ég var nokkuð rólegur í venjulegum leiktíma, þrátt fyrir að vörnin okkar hafi verið skelfileg. Ég man síðan voðalega lítið eftir framlengingunni annað en það að Madsen skoraði sigurmarkið," sagði Jorgensen ánægður.