Einar Hólmgeirsson úr leik á ný

Einar Hólmgeirsson, landsliðsmaður í handbolta, meiddist í leik með liði sínu, Grosswalsstadt, í þýska handboltanum um helgina. Einar var nýbúinn að ná sér af meiðslum sem hann varð fyrir í lok desember og urðu þess valdandi að hann missti af HM. Þetta kom fram í íþróttafréttum Stöðvar 2 í kvöld.

Hann var að leika sinn annan leik með Grossvaldstadt eftir meiðslin um helgina þegar liðið tapaði fyrir Nordhorn. Einar skoraði fimm mörk í leiknum en þurfti að yfirgefa völlinn í upphafi seinni hálfleiks. Einar verður frá keppni í tvo mánuði en hann fer í aðgerð á miðvikudaginn. Þetta er gríðarlegt áfall fyrir Einar, en hann hefur skrifað undir þriggja ára samning við Flensburg og gengur til liðs við félagið í sumar. Það er því hætt við að Einar hafi spilað sinn síðasta leik fyrir Grosswallstadt.