Samþykkt að auka hlutafé vegna kaupa á Tryggingamiðstöðinni

Hluthafafundur FL Group samþykkti í morgun að heimila stjórn félagsins að gefa út nýja hluti í félaginu upp á ríflega 1,3 milljarða króna að nafnvirði til þess að fjármagna kaup á hlutum í Tryggingamiðstöðinni.

Eykst hlutafé að nafnvirði úr 7,9 milljörðum í 9,2 milljarða. Fram kemur í tilkynningu til Kauphallar Íslands að hluthafar í FL Group hafi ekki forgangsrétt að hinum nýju hlutum og verður það í höndum stjórnar að ákveða sölugengi hlutanna, áskriftarfrest og greiðslukjör. Heimilt verður að greiða hina nýju hluti með hlutum í Tryggingamiðstöðinni.

Stjórn FL Group hélt fund í framhaldi af hluthafafundinum þar sem samþykkt var að gefa út ríflega 973 þúsund hluti til að ganga frá kaupum í Tryggingamiðstöðinni. Með því fellur fyrirvari um kaup á hlutum í Tryggingamiðstöðinni niður.

Á hluthafafundinum í morgun var einnig samþykkt að auka hlutafé FL Group um allt að tvo milljarða að nafnverði. Það skiptist þannig að hluthafar hafa ekki forgangsrétt að einum og hálfum milljarði.