Atlanta skoraði ekki körfu í þriðja leikhluta

Chicago hefur ekki gengið vel í NBA deildinni upp á síðkastið en liðið mætti vel einbeitt til leiks gegn Atlanta á heimavelli sínum í nótt. Chicago vann auðveldan 106-81 sigur og skoraði Atlanta öll 8 stig sín í þriðja leikhlutanum úr vítaskotum.

Það hafði ekki mikið að segja fyrir Chicago í þessum leik að skorarinn Ben Gordon þyrfti að fara tognaður af velli í þriðja leikhlutanum, en þá klikkaði Atlanta á öllum 16 skotum sínum. Chris Duhon skoraði 17 stig fyrir Chicago í leiknum en Josh Childress skoraði 16 fyrir Atlanta.

Allen Iverson lék á ný með Denver Nuggets eftir meiðsli en það hafði ekkert að segja gegn San Antonio þar sem Denver steinlá 95-80. Carmelo Anthony skoraði 15 stig fyrir Denver sem skoraði aðeins 10 stig í þriðja leikhluta og bjargaði andlitinu með 32 stigum í fjórða leikhlutanum þegar minni spámenn liðanna fengu að spreyta sig. Tony Parker skoraði 17 stig í jöfnu og sterku liði San Antonio, þar sem Tim Duncan spilaði ekki nema 25 mínútur.

Washington lagði Minnesota á heimavelli 112-100 þar sem Gilbert Arenas hristi af sér slenið og skoraði 38 stig. Arenas hafði verið arfaslakur í síðustu leikjum og kom greinilega endurnærður úr stjörnuleiknum. Kevin Garnett var að vanda atkvæðamestur hjá Minnesota með 26 stig og 13 fráköst.

Charlotte vann góðan sigur á New Orleans 104-100. Raymond Felton skoraði 21 stig og gaf 11 stoðsendingar fyrir Charlotte en Chris Paul skoraði 20 stig og gaf 7 stoðsendingar fyrir New Orleans í einvígi leikstjórnendanna sterku úr nýliðavalinu í hittifyrra.

New York vann sigur á Orlando 100-94 þar sem New York vann 24. leikinn á tímabilinu og hefur þar með unnið fleiri leiki í vetur en allt tímabilið í fyrra. Jamal Crawford og Eddy Curry skoruðu 20 stig hvor fyrir New York en Dwight Howard skoraði 27 stig og hirti 14 fráköst fyrir Orlando.

Detroit vann nauman sigur á Milwaukee 84-83 í beinni útsendingu á NBA TV, þar sem Michael Redd sneri aftur eftir meiðsli í liði Milwaukee. Chauncey Billups skoraði 19 stig fyrir Detroit en Charlie Bell var með 22 fyrir heimamenn.

Portland batt enda á sigurgöngu Utah með 103-100 sigri á heimavelli. Utah var án tveggja sinna bestu leikmanna. Mehmet Okur skoraði 25 stig fyrir Utah en Brandon Roy skoraði 27 stig fyrir Portland.

Sacramento lagði Boston 104-101 og var þetta 19. tap Boston í síðustu 20 leikjum. Paul Pierce skoraði 26 stig fyrir Boston en Kevin Martin skoraði 22 stig fyrir Sacramento.

Seattle lagði Memphis 121-105 þar sem Mike Miller skoraði 20 stig fyrir Memphis en Rashard Lewis var með 34 stig fyrir Seattle.

Loks sneri Steve Nash aftur í lið Phoenix sem burstaði LA Clippers á útivelli 115-90. Shawn Marion skoraði 31 stig og hirti 9 fráköst fyrir Phoenix en Corey Maggette skoraði 19 stig fyrir Clippers.