Pétur frá Glitni til Símans

Pétur Þ. Óskarsson, forstöðumaður kynningarmála hjá Glitni, hefur verið framkvæmdastjóri samskiptasviðs Skipta, móðurfélags Símans, Skjásins, Mílu, Þjónustufyrirtækisins Já og fleiri félaga.

Eftir því sem segir í tilkynningu frá Skiptum mun Pétur stjórna samskiptum félagsins við fjölmiðla, markaðsaðila og fjárfesta á Íslandi og erlendis en eins og kunnugt er stendur til að skrá félagið á markað á næstu mánuðum. Pétur tekur sæti í framkvæmdastjórn Skipta og mun einnig starfa að stefnumótun félagsins í samstarfi við forstjóra Skipta, Brynjólf Bjarnason.

Pétur hefur undanfarin tvö ár gegnt starfi forstöðumanns kynningarmála Glitnis. Hann lauk BA-prófi í heimspeki við Háskóla Íslands og MBA-prófi frá Fordham-háskóla í New York með áherslu á markaðsfræði og stjórnun og rekstur fjölmiðla.