Fremstir í Frakklandi

Kepler Equities | Landsbanki hefur verið valinn fremsta greiningarfyrirtæki Frakklands í ítarlegri könnun rannsóknarfyrirtækisins StarMine. Í könnuninni, sem náði til fjögurra flokka, voru borin saman meðmæli og hagnaðarspár fyrir félög í CAC 40 vísitölunni og á markaði meðalstórra fyrirtækja. Kepler var eina fyrirtækið sem komst í hóp fimm efstu fyrirtækjanna í öllum flokkum, að því er fram kemur í tilkynningu frá Landsbankanum.

Á meðal flokkanna voru nákvæmni í meðmælum greiningardeilda fjármálafyrirtækja um kaup á hlutabréfum, bæði í flokki stærstu fyrirtækja Frakklands sem og í flokki meðalstórra fyrirtækja í landinu. Margir stórir bankar og greiningarfyrirtæki á borð við J.P. Morgan, HSBC, Credit Suisse og Citigroup höfnuðu í sætum fyrir neðan.

Þá varð Kepler í öðru sæti yfir nákvæmni þegar bornar voru saman hagnaðarpár greiningaraðila og rauntölur fyrir meðalstór fyrirtæki í Frakklandi. Bankinn varð hins vegar í fimmta sæti hvað varðar hagnaðarspár stærstu fyrirtækja í Frakklandi.

Þetta er í annað skipti á þremur mánuðum sem Kepler er í fyrsta sæti yfir bestu verðbréfafyrirtækin því í nóvember í fyrra varð Kepler efst í könnun fjármálatímaritsins Bloomberg yfir bestu verðbréfafyrirtæki í Evrópu.