Meirihlutinn situr við sinn keip

Hópur Eyjamanna, sem á meirihluta hlutafjár í Vinnslustöðinni, birtir í dag opinbert yfirtökutilboð í félagið þar sem boðnar eru 4,6 krónur fyrir hvern hlut. Hópurinn, sem samanstendur af Haraldi og Kristínu Gíslabörnum og Sigurgeiri Brynjari Kristgeirssyni, forstjóra félagsins, hyggst sitja við sinn keip, jafnvel þótt að síðasta viðskiptagengi Vinnslustöðvarinnar hafi verið 8,3 krónur á hlut. Gengið 8,3 er sjötíu prósent yfir tilboðsverði að teknu tilliti til þrjátíu prósenta arðgreiðslu fyrir síðasta ár.

Eins og komið hefur fram í Markaðnum eru hluthafar í Vinnslustöðinni ekki á eitt sáttir um verðmæti „síðasta móhíkanans“, eins og síðasta útgerðarfélagið á Aðallista Kauphallar hefur verið kallað. Guðmundur Kristjánsson, forstjóri Brims, sem fer fyrir ríflega þrjátíu prósenta hlutafjár í Vinnslustöðinni, hefur lýst því að yfirtökutilboðið sé of lágt. Landsbankinn keypti mikið magn af bréfum í gær en talið er líklegt að Guðmundur standi á bak við þau viðskipti.

Samkvæmt heimildum Markaðarins er talið ólíklegt að samkomulag náist með stærstu hluthöfum Vinnslustöðvarinnar að svo stöddu.

Meirihluti hluthafa óskar jafnframt eftir því við stjórn Kauphallarinnar að Vinnslustöðin verði afskráð úr Kauphöll samhliða yfirtökutilboði. Væntanlega verður félagið afskráð úr Kauphöll miðað við óbreytta stöðu. Ætla má að smáir hluthafar selji bréf sín áfram ef núverandi kjör bjóðast og gæti því eignarhaldið í félaginu þrengst enn meira.

Greiningardeildir Glitnis og Kaupþings meta markgengið í Vinnslustöðinni til tólf mánaða á 4,7-4,8 krónur en markaðsvirðið er að allra mati hærra ef aflaheimildir yrðu seldar. Vinnslustöðin hagnaðist um 765 milljónir króna á fyrsta ársfjórðungi sem var mikill viðsnúningur þegar félagið tapaði 213 milljónum króna. Hlutabréf í Vinnslustöðinni hafa sýnt mesta hækkun skráðra félaga á árinu, eða um 84 prósenta ávöxtun.