Kátt í kauphöllinni

Úrvalsvísitalan hækkaði um 1,82 prósent í gær og stendur í 8.702 stigum sem er hæsta gildi hennar frá upphafi. Bréf í Exista hækkuðu mest, um 4,78 prósent. Icelandair hækkaði um 3,67 prósent og Kaupþing um 2,69 prósent.

Alls hækkuðu bréf níu af fjórtán félögum í úrvalsvísitölunni, en einungis þrjú félög lækkuðu. Bréf í Össuri lækkuðu mest, um 2,27 prósent.

Úrvalsvísitalan hefur hækkað um tæp þrjátíu og sex prósent frá áramótum. Greiningardeild Glitnis hefur spáð fjörutíu og fimm prósenta hækkun á árinu, samanborið við 15,8 prósenta hækkun í fyrra.

Jónas Friðþjófsson, sérfræðingur greiningar Glitnis, segir bjart yfir markaðnum. Spár bankanna hafi allar gert ráð fyrir hækkunum auk þess sem von sé á góðum uppgjörum frá þungavigtarfélögum. „Útlitið er mjög bjart og aðstæður góðar. Síðan bætist við að Actavis er á leiðinni út af markaði. Þar losnar um mikið af peningum og hluti þeirra fer væntanlega á innlendan hlutabréfamarkað.“

Jónas telur líklegt að afkomuspár bankanna hafi haft sitt að segja um hækkanir undanfarinna daga. „Ef maður mætir á svæðið og segir tólf prósenta hækkun fram undan næstu sex mánuði er eðlilegt að einhverjir fjárfestar hlaupi til. Í kjölfarið fylgir síðan hækkunarrykkur og það er einmitt það sem við erum að sjá.“

Greiningardeild Kaupþings hefur spáð því að úrvalsvísitalan endi í 9.000 til 9.500 stigum í árslok. Haraldur Yngvi Pétursson, sérfræðingur greiningardeildar, segir hækkanir undanfarinna daga hugsanlega skýrast af þremur meginþáttum. „Í fyrsta lagi finnst mér líklegt að við sjáum áhrif afskráningar Actavis. Auk þess eru menn líklega að nýta sér áframhald á hagstæðri fjár­mögnun í erlendum myntum eftir stýrivaxtaákvörðun Seðlabankans. Loks hafa bankarnir birt hagstæðar afkomuspár undanfarna daga sem gætu leitt til hreyfinga á markaði.“

Haraldur Yngvi segist ekki endilega sjá neinar lækkanir í spilunum en útilokar þó ekki að smávægileg leiðrétting eigi sér stað. „Markaðurinn hefur náttúrlega hækkað mikið á skömmum tíma. Það er ekkert óalgengt að slíkum hækkunum fylgi einhverjar lækkanir.“