Alcan og Straumsvík

Þegar Davíð Oddsson og félagar unnu frækinn sigur í kosningunum í Reykjavík 1982 og felldu þáverandi meirihluta, var aðalkosningamálið að byggja nýtt hverfi við Grafarvog í staðinn fyrir nágrenni Rauðavatns. Það átti að byggja með ströndum fram í stað heiða og auk þess var Rauðavatnið talið á “hættulegu sprungusvæði”.

Síðan eru þessar kosningar nefndar sem skólabókardæmi um velútfærða kosningabaráttu og nú búa þúsundir fólks í nágrenni Grafarvogs. Það grátbroslega við Rauðavatnið er hins vegar það, að þar hefur Morgunblaðið reist höfuðstöðvar sínar - á sprungusvæði!.

Fljótlega eftir að byggð myndaðist við Grafarvog og Gufunes, var farið að gera athugasemdir við áburðarverksmiðjuna og staðsetningu hennar. Það þótti ekki gáfulegt að svona “sprengiverksmiðja” væri staðsett nálægt íbúabyggð. Verksmiðjan var síðan seld og áburðarframleiðslu hætt. Hagsmunir íbúabyggðarinnar voru látnir ráða.

Hvers vegna er ég að rifja upp þessa sögu?. Í kosningaslagnum um stækkun álversins í Straumsvík er því mjög haldið að fólki af fylgjendum stækkunarinnar, að það hafi verið fáránlegt af ráðamönnum Hafnarfjarðar, að leyfa íbúabyggð í nágrenni álversins í Straumsvík. Það sé ekki álverinu að kenna að þarna skarist hagsmunir, heldur skipulagsyfirvöldum í Hafnarfirði. Það hefði frekar átt að teygja byggðina í áttina að Kaldárseli og Helgafelli - upp til heiða í stað stranda.

Stefna Davíðs og félaga varð ofan á í Reykjavík og nú vill eftirmaður hans í stól borgarstjóra, Vilhjálmur Þ. Vilhjálmsson halda áfram og byggja úti á Geldinganesinu.

Er einhver munur á hagsmunum Reykjavíkur og Hafnarfjarðar í þessu samhengi?.

Er það ekki eðlilegt að byggðin í Hafnarfirði færist úr eftir Reykjanesi með nálægð við ströndina og Reykjanesbrautina?.

Í þessu máli eru talsmenn Alcan rökþrota í vörn sinni fyrir stækkun álversins, sem klýfur í sundur samfelluna í þróun byggðar til vestur frá Völlunum. Útsýni til hafs og fjallanna umhverfis Faxaflóann eru lífsgæði, sem sífellt fleiri vilja njóta. Kannski þarf Davíð að mæta á svæðið og hitta fyrir Golíat?

Höfundur er nágranni álversins í Straumsvík.