Askar Capital opnar skrifstofu í Mumbai

Fjárfestingarbankinn Askar Capital skrifaði í dag undir samstarfssamning við indverska fyrirtækið Skil Group í borginni Mumbai um leið og Askar opnuðu skrifstofu í borginni.

Forsvarsmenn Aska Capital eru í viðskiptasendinefnd sem fjármálaráðherra fór fyrir til Indlands og í dag skrifuðu þeir Haukur Harðarsson, stjórnarformaður Aska, og Tryggvi Þór Herbertsson forstjóri undir samninginn ásamt Asog Nikhil Gandhi, stjórnarformanni Skil Group.

Haft er eftir Guðjóni Svanssyni, forstöðumanni nýrra markaða hjá Útflutningsráði Íslands, að ferð viðskiptasendinefndarinnar hafi gengið vonum framar. Fulltrúar íslenskra fyrirtækja hafi átt mjög gagnlega fundi með hugsanlegum samstarfsaðilum á Indlandi og nú þegar hafi tveir samningar verið undirritaðir í ferðinni.

Búist er við að fleiri fylgi í kjölfarið en meðal þátttakenda í ferð viðskiptasendinefndarinnar eru fulltrúar frá Glitni, Kaupþingi, Landsbanka/Hydrokraft, Geysi Green Energy, Klauf, Háskólanum á Bifröst, Milestone og Nordic Visitor auk Aska Capital