Í tilkynningu frá Saving Iceland segir að samtökin hafi óskað eftir því að fulltrúar Orkuveitu Reykjavíkur taki þátt í opnum umræðum við þau um siðgæði þess að selja orku til fyrirtækja sem stunda glæpsamlega iðju, eins og bæði Century-Rusal og Alcan-Rio Tinto gera.
25 mótmælendur frá Saving Iceland fóru í dag inn í höfuðstöðvar
Orkuveitu Reykjavíkur og hengdu upp borða sem á var letrað
"Vopnaveita Reykjavíkur". Borðinn var ekki hengdur upp á þaki hússins eins og til stóð vegna veðurs en mótmælendur stöldruðu við í húsinu í tæplega klukkustund. Saving Iceland hafa haft samband við Orkuveitu Reykjavíkur og beðið um heimild til þess að hengja upp umræddan borða utan á höfuðstöðvar Orkuveitunnar.
Í tilkynningunni segir að Páll Erland talsmaður Orkuveitunnar staðhæfi að Saving Iceland hafi verið boðið að hengja upp borðann inni í húsinu en talsmenn Saving Iceland segja það ekki rétt. "Borðinn bendir á þá staðreynd að fyrirtækið selur orku til aðila sem eru viðriðnir vopnaframleiðslu og alvarleg brot á mannréttindum, " segir í tilkynningunni.
