Átta ríkisprestar kæra

Ég hef verið ákærður fyrir lúterska hugsun og athæfi.

Ég hef í anda Lúters barist fyrir því að komið verði á jafnræði trúfélaga og að samkynhneigðir megi njóta sömu réttinda og aðrir innan kirkjunnar. Fyrir þetta hef ég verið ákærður. Ákærugögnin eru predikanir mínar, greinaskrif og annað sem fjallar um þetta tvennt. Asninn, síra Geir Waage, nasisminn og gullið

Sem forstöðumaður Fríkirkjunnar í Reykjavík hef ég barist fyrir því að samkynhneigðir geti gengið í hjónaband. Forstöðumenn annarra lúterskra fríkirkna eru sama sinnis og það er sannarlega í samhljóman við vilja meirihluta þjóðarinnar. Prestastefna þjóðkirkjunnar kolfelldi það mál. Síra Geir Waage líkti þar guðfræðilegri afstöðu manna til samkynhneigðar við afstöðu manna forðum til nasisma Hitlers. Hann hefur heldur ekki háar hugmyndir um fríkirkjufólk.

Á kirkjuþingi 2001 líkti Síra Geir fríkirkjufólki við asna sem stendur hlaðinn gulli utan við borgarmúrana. Prestar, prófastar, biskupar sem prófessorar ræddu þessi mál sín á milli. Fjallað var um hvernig hægt væri að lokka asnann (fríkirkjufólk) inn fyrir borgarmúrinn (þjóðkirkjuna), ná gullinu (trúfélagsgjöld) af baki hans en senda asnann síðan aftur út fyrir borgarmúrinn þar sem hann ætti helst heima. Nú virðist enginn af þeim æðstu mönnum þjóðkirkjunnar sem þar voru og tóku þátt í umræðunni hafa fundið neitt að þessum líkingum.

4 ákærendur í Hjalla – og DigraneskirkjumPrestar þar hafa nú nýverið þverbrotið siðareglur Prestafélagsins gagnvart fríkirkjufólki. Síðan hafa þeir ásamt talsmönnum biskupsstofu ítrekað fullyrt að um einangrað atvik hafi verið að ræða. Þær fullyrðingar eru ekki sannar. Það tilvik sem hér um ræðir er ekkert einsdæmi og vitni eru til staðar. Árið 2003 hvatti sjálfur formaður Prestafélags Íslands alla ríkislaunaða þjóðkirkjupresta til að nýta forréttindaaðstöðu sína og skrá sem flesta úr frjálsum trúfélögum inn í ríkiskirkjuna til að auka mismun trúfélaga enn meira. Siðlegt? Hobbíprestur á Hofsósi

Einn helsti talsmaður ákærenda virðist vera sr. Gunnar Jóhannesson prestur á Hofsósi. Hann hefur nægan tíma til að skrifar greinar um persónu mína, hvernig hann telur mig hafa rofið mitt vígsluheit gagnvart Guði með því að gagnrýna ríkiskirkjuna. Við öll, utanþjóðkirkjufólk meðtalið, greiðum honum dágóð ríkislaun með sköttum okkar, fyrir að veita aðeins um fimmhundruð manns prestsþjónustu. Sjálfur er ég í forsvari fyrir söfnuði sem brátt telur um átta-þúsund manns.

Líklegast tekur það sr. Gunnar allnokkur ár að vinna þau verk sem ég vinn á örfáum mánuðum. Hann þarf ekki að vinna svo mikið því hann fær ríkislaun sín hvort sem er. Er þetta forsvaranlegt? Allt Skagafjarðarprófastsdæmi sem Hofsósprestur tilheyrir telur aðeins um 5000 manns og þar eru heilir 6 ríkislaunaðir prestar á dágóðum ríkislaunum! Hér er íslenska ríkið að sóa almannafé.

Jafnræði trúfélaga – söfnuður greiði laun

Sr. Gunnar á Hofsósi með allan þann frítíma sem hann nýtur í okkar boði, ætti trúar sinnar vegna að beita sér fyrir því að hann fái laun sín greidd frá þeim söfnuði sem hann þjónar. Það fyrirkomulag er biblíulegt og kristilegt. Það fyrirkomulag er evangelískt og lúterskt. Það er einnig í þágu neytenda ef menn vilja líta þannig á málið. Það er í anda þeirra annarra trúfélaga sem ríkiskirkjan hefur eftir hentugleikum viljað tengja sig við. Það er í anda gjörvallrar kristni bæði fyrr á öldum sem og í dag.

Með því kæmist á jafnræði trúfélaga hér á landi.

Þá ríktu loks þær forsendur lýðræðis og jafnræðis sem geta gefið evangelískri lúterskri kirkju myndugleika á ný. Karl Sigurbjörnsson biskup hefur nú í fjögur og hálft ár hundsað erindi Fríkirkjunnar um þessi mál. Svar biskups er köld og hávær þögn. Það minnir á þann andlega hafís sem ískaldri og vonarsnauðri þoku stafar frá, svo að vitnað sé í hans eigin líkingar.

Hversvegna ættum við Íslendingar að viðhalda hér löngu úreltu ríkiskirkjufyrirkomulagi sem hindrar framgang mannréttinda og engir aðrir vilja sjá?

Hjörtur Magni Jóhannsson

Forstöðumaður og prestur hinnar evangelísk - lútersku Fríkirkju í Reykjavík

Nöfn ákærenda, ákæru og bréfaskriftir sem vísað er til má finna á frikirkjan.is