Ríkissjónvarpið á Kúbu birti í gær myndbandsupptöku af Fídel Kastró, forseta landsins, þá fyrstu sem sýnd er af honum í fjóra mánuði. Forsetinn, sem er áttræður, hefur ekki komið fram opinberlega síðan í júlí í fyrra þegar hann gekkst undir magaaðgerðir.
Í gær var haft eftir forseta kúbverska þingsins að Kastró hefði að mestu náð fyrri heilsu en óvíst væri hvenæar hann tæki við stjórnartaunum aftur en í fyrra fól hann Raúl bróður sínum stjórn landsins.
Á nýja myndbandinu fundar Kastró með Nong Duc Manh, leiðtoga kommúnistaflokksins í Víetnam. Forsetinn virðist nokkuð heilsuhraustari þar en á þeim myndum sem birtar voru af honum fyrr á árinu.
