OECD beitir sér gegn mútumálum

Ríkisstjórnir verða að standa saman gegn spillingu og mútuþægni. Þetta kom fram á ráðstefnu OECD um spillingu og mútuþægni í París í síðustu viku.

José Angel Gurría, aðalframkvæmdastjóri OECD, sagði á ráðstefnunni að aðildarríki stofnunarinnar yrðu að leggja mikla áherslu á stefnu sína gagnvart mútum og spillingu af hverju tagi sem til væri. Hann benti hins vegar á að hann væri þakklátur fyrir að aðildarríkin berðust af hörku gegn óhæfu sem þessari, sem sýndi fram á viðhorf þeirra til þessa mikilvæga málaflokks.

Mál bresku samstæðunnar BAE Systems var rætt á fundinum en í því eru stjórnendur samstæðunnar sakaðir um að hafa stofnað mútusjóð til að liðka fyrir sölu á hergögnum til stjórnvalda í Sádi-Arabíu. Viðskiptin eru í stærri kantinum og nema verðmæti þeirra 10 milljörðum breskra punda, jafnvirði tæpra 1.400 milljarða íslenskra króna. Efnahagsbrotadeild breska ríkisins hefur haft málið til rannsóknar síðan seint á síðasta ári en niðurstaða liggur ekki fyrir í því.

Á ráðstefnu OECD kom fram að mútusjóðir sem þessir væru litnir hornauga og ættu stjórnvöld ekki að að réttlæta gjörðir fyrirtækja sem leggi stund á slíkt með nokkru móti.