Íslensk verðbréf skila methagnaði

Íslensk verðbréf hf. á Akureyri skiluðu methagnaði á síðasta ári og einkenndist reksturinn af miklum vexti. Alls nam hagnaður félagsins 403 milljónum króna.

Fyrirtækið sérhæfir sig í eignastýringu og stýrir um níutíu milljörðum króna fyrir viðskiptavini sem eru meðal annars lífeyrissjóðir, tryggingafélög og einstaklingar. Sævar Helgason, framkvæmdastjóri Íslenskra verðbréfa, segir að auk methagnaðar hafi talsverð aukning orðið á eignum í stýringu. „Árangurinn má þakka skýrri stefnu ásamt öflugum og samstilltum hópi starfsmanna,“ segir Sævar í fréttatilkynningu.

Stærstu hluthafar félagsins eru Íslensk eignastýring, Sparisjóður Norðlendinga og Lífeyrissjóður Norðurlands.

Félagið fagnar tuttugu ára afmæli sínu á þessu ári.