Fiskverð í hæstu hæðum

Mjög hátt verð fékkst fyrir fisk á fiskmörkuðum landsins í síðustu viku eða 185,75 krónur að meðaltali fyrir kíló sem er 6,52 króna hækkun á milli vikna. Vefur Fiskifrétta segir þetta jafngilda því að aflaverðmæti síðustu viku hafi numið 294 milljónum króna.

Líkt og oft áður seldist mest af ýsu eða 660 tonn sem er 12 tonnum minna en í vikunni á undan. Slægð ýsa fór á 183 krónur á kíló sem er tæpum sex krónum meira en í fyrri vikunni.

Þorskur hefur tryggt sér annað sætið yfir mest seldu tegundir á mörkuðunum. Í heildina seldust 482 tonn og fór slægður þorskur á 275,12 krónur á kíló samanborið við 270,17 krónur í vikunni á undan.

Mun minna framboð var af öðrum tegundum. Framboð á steinbít minnkaði um 28 tonn á milli vikna og fengust 155,02 krónur fyrir kílóið sem er rúmlega níu króna lækkun á milli vikna.

Aðrar tegundir seldust minna enda nokkur samdráttur á framboði tegunda á borð við ufsa og gullkarfa á markaðnum í liðinni viku en í vikunni á undan.