Milestone tekur stöðu í Carnegie

Fjárfestingafyrirtækið Milestone, í eigu þeirra Karls og Steingríms Wernerssona, hefur fjárfest grimmt í sænska bankanum Carnegie og er nú stærsti hluthafi bankans með 9,7% hlut. Að sögn danska blaðsins Börsen hefur Milestone greitt um 7,4 milljarða skr. fyrir hlutinn eða um 74 milljarða kr. Glitnir hefur einnig keypt hluti í bankanum og á nú 1,8 milljón hluti.

Töluverð umræða hefur orðið um Carnegie bankann í norrænum fjármálatíðindum síðustu daga í kjölfar þess að sænska fjármálaeftirlitið sektaði bankann um 50 milljónir skr. og krafðist þess að forstjórinn og stjórnin segðu af sér í heilu lagi. Í umfjöllun Hálf fimm frétta Kaupþings banka um málið segir að í ljós hafi komið að félagið hafði eignfært valréttarsamninga á árunum 2005-2007 of hátt sem leiddi til þess að aukagreiðslur til starfsmanna urðu hærri en ella.

Og fleiri sektir eru í farvatninu. Þannig segir í frétt á MSNBC.com að Carnegie geti átt yfir höfði sér allt 630 milljón skr. sekt í kjölfar rannsóknar sænska fjármálaeftirlitsins á vafasömum viðskiptum stjórnar bankans.

Carengie-hneykslið hefur þegar kostað tvo háttsetta menn innan sænska stjórnkerfisins störf sín. Karin Forseke, fyrrum forstjóri Carnegie, sagði af sér sem sérstakur ráðgjafi sænsku einkavæðingarnefndarinnar á mánudaginn. Og í dag er greint frá því að Urban Funered, fyrrum starfsmaður bankans, hafi sagt af sér sem ritari Mats Odell viðskiptaráðherra Svíþjóðar. Mats Odell hefur verið harðlega gagnrýndur fyrir að hafa ekki gripið inn í Carnegie-hneykslið fyrr og mun þurfa að gera grein fyrir máli sínu í sérstökum fyrirspurnartíma á sænska þinginu á morgunn.

Í Hálf fimm fréttum segir m.a. að með kaupum Milestone, í gegnum fjármálafyrirtækið sitt Invik, eru íslenskir fjárfestar orðnir stærstu hluthafarnir í Carnegie á nýjan leik en Landsbankinn átti þar tæpan fimmtungshlut um hríð sem hann seldi með tíu milljarða króna gengishagnaði á vordögum 2006.

"Invik er ekki eitt um það að vera áhugasamt um Carnegie því norski fjárfestingarbankinn ABG Sundal Collier tilkynnti í gær að hann hefði eignast um 5,42% hlut í Carnegie. Þá sópaði Glitnir upp 1,8 milljónum hluta í Carnegie fyrir helgi, nærri tveggja prósenta hlut, að sögn Reuters. Óvíst er hvort Glitnir hafi verið að kaupa bréfin fyrir sjálfan sig eða þriðja aðila, til dæmis Invik," segir í Hálf fimm fréttum.

"Carnegie er meðal fárra útvaldra fjárfestingarbanka sem hafa fengið það vel launaða verkefni að liðsinna sænskum stjórnvöldum við einkavæðingu ríkisfyrirtækja og eignarhluta í eigu ríkisins að því er fram kemur í Financial Times. Bankinn hefur aðstoðað ríkið við að sölu á átta prósenta hlut í TeliaSonera og er eini ráðgjafinn á 6,6% hlut þess í OMX-kauphallarsamstæðunni. Hins vegar gæti ráðgjöf Carnegie varðandi sölu á fasteignalánabankanum SBAB verið í uppnámi en viðskiptaráðherrann Mats Odell hefur til skoðunar að leysa bankann frá verkefninu."