Hagnaður á hlut dregst saman um fjórðung

Hagnaður hluthafa Straums-Burðaráss nemur 1,8 milljónum evra eftir skatta á þriðja ársfjórðungi, en 17 milljónum á sama tíma í fyrra. Meðalspá greiningardeilda bankanna gerði ráð fyrir hagnaði upp á 10,8 milljónir evra.

Hagnaður á hlut í Straumi-Burðarási dregst saman um 26 prósent þegar bornir eru saman fyrstu níu mánuðir þessa árs og síðasta. Í fyrra nam hagnaðurinn 23 evrum á hlut, eða rétt tæpar 2.000 krónur. Eftir þriðja ársfjórðung í ár er hagnaður á hlut hins vegar kominn í 17 evrur á hlut, eða tæpar 1.500 krónur. Bankinn birti í gærmorgun uppgjör fyrir þriðja ársfjórðung þessa árs.

Hagnaður hluthafa eftir skatta á þriðja ársfjórðungi er 1,8 milljónir evra, en var á sama tíma í fyrra 17 milljónir evra. Fyrstu níu mánuði ársins nemur hagnaður hluthafa eftir skatta 157 milljónum evra og dregst saman um 33,9 prósent frá því í fyrra þegar hann var 237,5 milljónir evra.

Willam Fall, forstjóri Straums, bendir hins vegar á að um leið og rekstrartekjur á þriðja ársfjórðungi hafi endað í 32,8 milljónum evra á þriðja ársfjórðungi, sem raunar er 2,6 prósenta aukning frá árinu áður, hafi tap af verðbréfum numið 45 til 46 milljónum dala á fjórðungnum.

„Í þessum árangri endurspeglast því breiðari tekjugrunnur félagsins,“ segir hann og telur að breytingar sem ráðist hefur verið í hjá bankanum hafi bætt mjög afkomu hans í erfiðu árferði sem einkennst hafi af óróa á fjármálamörkuðum.

William Fall bendir á að Straumur hafi haldið áfram að auka vaxta- og þóknunartekjur og þær séu nú drifkrafturinn í starfsemi bankans. Þá hafi markvisst verið dregið úr áhættuskuldbindingum í hlutabréfum.

Forstjóri Straums leggur áherslu á að áhætta bankans af undirmálslánum í Bandaríkjunum sé engin, þótt óbein áhrif megi merkja. Þannig hafi órói á fjármálamörkuðum seinkað verkefnum og samningum og af þeim sökum færist inn í lokaársfjórðung ársins tekjur sem bankinn hafi reiknað með á þeim þriðja.

Að sama skapi segir hann að hraður tekjuvöxtur á öðrum ársfjórðungi hafi líka tekið frá þeim þriðja.

Afkoma Straums er nokkuð frá spám greiningardeilda bankanna, en þær gerðu ráð fyrir yfir 10 milljóna evra hagnaði til hluthafa í stað 1,8 milljóna. Nokkru munaði þó því Glitnir spáði 7 milljóna tapi, en Landsbankinn og Kaupþing, 9,7 og 14,5 milljóna evra hagnaði. Glitnir segir afkomuna þó „gróflega í takti við væntingar“ nema hvað hreinar vaxtatekjur hafi reynst miklu hærri en vænst var og þóknunartekjur langt undir væntingum.