Nýherji kaupir TM Software

Nýherji hefur samið um kaup á 77 prósentum af hlutafé í upplýsingatæknifyrirtækinu TM Software (TMS) af Straumi, FL Group og Tryggingamiðstöðinni. Hluturinn kostar 1,3 milljarða króna, en miðað er við að heildarverð hlutabréfa í TMS sé 1,7 milljarðar.

Straumur hafði milligöngu um kaupin, en þau eru háð bæði niðurstöðu áreiðanleikakönnunar og samþykkis samkeppnisyfirvalda.

Að sögn Þórðar Sverrissonar, forstjóra Nýherja, verður TMS rekið sem dótturfélag Nýherja, en velta samstæðunnar eftir kaupin verður um 13 milljarðar króna og starfsmenn um 750 talsins.

Í tilkynningu um kaupin kemur fram að hjá TMS starfi 280 manns og að tekjur fyrirtækisins á árinu séu áætlaðar um 2,5 milljarðar króna.

„Veltuaukningin nemur um 25 prósentum, en af því TMS er þjónustufyrirtæki bætist þarna við töluvert af starfsfólki,“ segir Þórður Sverrisson, forstjóri Nýherja. Hann segir félagið tilbúið að kaupa þá hluti sem eftir standa á sömu kjörum og samið var um nú.

„En svo er hluthöfum náttúrulega frálst að eiga áfram hlut sinn í TM Software. Þeir ráða því.“

Þórður segir markmiðið með kaupunum að styrkja stöðu Nýherjasamstæðunnar á sviði rekstrarþjónustu, hýsingar og þróunar sérhæfðra hugbúnaðarlausna.

„Með kaupum býðst viðskiptavinum fullkomin heildarþjónusta á sviði upplýsingatækni. Kaupin styrkja stöðu félagsins og til verður fremsta hýsingarfyrirtæki og öflugasta upplýsingatæknifyrirtæki landsins.“

Nýherji ráðgerir að gefa út nýtt hlutafé, 55 milljónir króna að nafnverði, til þess að fjármagna kaupin að hluta. Hlutaféð verður boðið til kaups á genginu 22 krónur á hlut og eru því 1.210 milljónir króna fjármagnaðar með sölu hlutafjár.

Greiðsla fyrir þau 77 prósent sem keypt hafa verið er því að 32,35 prósentum greidd með hlutabréfum í Nýherja en 67,65 prósentum í peningum.

„Áformað er að verja allt að 25 milljónum að nafnverði hlutafjár til að greiða hluthöfum í TMS en 30 milljónir verða boðnar núverandi hluthöfum í Nýherja,“ segir í tilkynningu.

Eftirstöðvar kaupverðsins verða fjármagnaðar með lánsfé og úr sjóðum félagsins. Gengi bréfa Nýherja hækkaði um rúm fjögur prósent í Kauphöll Íslands í gær og enduðu í 22,9 krónum á hlut.