Atorka horfir til að innleysa hagnað af 2-4 fjárfestingum

Magnús Jónsson, forstjóri Atorku Group, reiknar með að á næstu sex til átján mánuðum muni félagið leysa út hagnað af 2-4 fjárfestingum á svipaðri stærðargráðu og Jarðboranir. Þær voru seldar til Geysis Green Energy á dögunum fyrir 17,7 milljarða króna og innleysti Atorka um ellefu milljarða króna á fjárfestingunni frá upphafi.

Í staðinn gerðist Atorka hluthafi í Geysi í ágúst með kaupum á 32 prósenta hlut. Magnús er bjartsýnn á hraða uppbyggingu Geysis á sviði fjárfestinga í orkugeiranum og nefnir að hugsanlega verði félagið skráð á hlutabréfamarkað innan átján mánaða.

Þá stefna eigendur Promens, með Atorku í broddi fylkingar, að skrá félagið í Kauphöll um áramótin, að því gefnu að ekki verði farið í stærri yfirtökur og markaðsaðstæður verði í lagi. Nær væri þó að horfa á fyrsta ársfjórðung næsta árs þar sem stækkun Promens virðist vera á borðinu sem gæti tafið undirbúning skráningar. „Við erum með nokkur spennandi mál til frekari stækkunar á Promens, bæði með innri vexti og fyrirtækjakaupum. Promens hefur verið að klára stór verkefni, meðal annars kaupin á Polimoon í fyrra. Við erum því klár í næstu bita.“

Promens hagnaðist um 800 milljónir króna fyrir skatta á fyrri hluta ársins áður en reiknaðir eru vextir á láni frá hluthöfum sem breytanlegt er í hlutafé.

Fjárfestingargeta Atorku er mikil eftir söluna á Jarðborunum en eiginfjárhlutfall móðurfélags var um 39 prósent um mitt árið. Magnús segir að félagið horfi til fjárfestinga ákveðnum vaxtargeirum þar sem markaðurinn hefur ekki enn þá verðlagt vöxtinn. „Eins og við gerðum í sjálfu sér þegar við fórum inn í sólarorkuna með kaupum í Romag í Bretlandi.“ Hann vill ekki nefna þá geira sem félagið horfir til að svo stöddu.

Móðurfélag Atorku skilaði ríflega sex milljarða króna hagnaði á fyrri hluta ársins sem var um 24 prósenta auking á milli ára. Hagnaður félagsins var þrír milljarðar króna á öðrum ársfjórðungi. Hins vegar tapaði samstæða Atorku 226 milljónum króna á fyrra hluta ársins.