Sampo vill sænskan bankasamruna

Stjórnendur finnska fjármálafyrirtækisins Sampo Group, sem er að fimmtungshluta í eigu Existu, vilja sjá bankasamruna í Svíþjóð. Björn Wahlroos, forstjóri Sampo, segir að sér lítist vel á slá Nordea, stærsta fjármálafyrirtæki Norðurlanda, saman við Handelsbanken. Sampo er annar stærsti hluthafinn í Nordea á eftir sænska ríkinu með 3,7 prósenta hlut sem metinn er á 100 milljarða króna.

„Mesta samlegðin liggur með Handelsbanken en þar með er ekki sagt að sú niðurstaða sé sú líklegasta. Það eru einnig mikil tækifæri milli Nordea og SEB," segir Björn í samtali við Dagens Nyheter.

Þörfin á bankasamrunum í Skandinavíu hefyr verið rædd lengi en Sampo er tilbúið að bíða, enda er kaup félagsins í Nordea hugsuð til lengri tíma. Björn telur ekki nauðsynlegt að sækjast eftir sæti í stjórn Nordea þótt eignarhluturinn dygði til þess.

Af Sampo er það annars að frétta að félagið hagnaðist um 214 milljónir evra, um nítján milljarða króna á öðrum ársfjórðungi. Þetta var 37 prósent meiri hagnaður en á sama tíma í fyrra. Tryggingastarfsemi félagsins gekk vel og þá jukust fjárfestingatekjur sökum góðs árferðis á mörkuðum.

Á fyrstu sex mánuðunum ársins hagnaðist Sampo um 3,27 milljarða evra, jafnvirði 288 milljarða króna. Hafa ber í huga að þessi mikli hagnaður er að stærstum hluta tilkominn vegna söluhagnaðar af Sampo Bank í byrjun þessa árs. Sampo situr nú á 350 milljörðum króna sem sérfræðingar búasta við að nýttir verði til frekari fjárfestinga á norrænum bankamarkaði.