Nerdrum selur Ingunni Borgarbókasafnshúsið

Fjárfestirinn Ingunn Wernersdóttir hefur keypt eitt fallegasta húsið í Reykjavík, Esjuberg, sem stendur á Þingholtsstræti 29a.

Seljandi hússins er einkahlutafélag norska listmálarans Odds Nerdrum, sem á árinu 2002 keypti húsið af félaginu Frumkvöðlaaðstöðunni, sem var í eigu Guðjóns Más Guðmundssonar sem kenndur er við hugbúnaðarfyrirtækið OZ.

Nerdrum mun vera fluttur frá Íslandi til býlis í firði í heimalandi hans, Noregi.

Guðjón átti hæsta tilboðið þegar Reykjavíkurborg auglýsti húsið til sölu í tengslum við flutninga Borgarbókasafnsins í Grófina. Guðjón keypti húsið í nóvember árið 2000 og sagðist mundu reka þar frumkvöðlasetur fyrir ungt fólk. Ekkert varð úr þeim fyrirætlunum og við söluna til Nerdrums aflétti borgin öllum kvöðum og heimilaði að húsið yrði nýtt sem íbúðarhúsnæði.

Guðjón greiddi 70 milljónir króna fyrir húsið en seldi Nerdrum það tæpum tveimur árum síðar á 100 milljónir króna.

Viðskiptin með Þingholtsstræti 29a eru enn ekki að fullu frágengin og ekki fæst gefið upp hvað Ingunn Wernersdóttir greiddi Odd Nerdrum fyrir húsið en talið er víst að það sé alls ekki undir 200 milljónum króna og sennilega mun hærra. Nerdrum mun hafa endurnýjað húsið að innan að nokkru leyti þann tíma sem það var í hans eigu.

Ekki náðist í Ingunni Wernersdóttur í gær. Samkvæmt heimildum Fréttablaðsins mun notkun hússins enn ekki endanlega ákveðin.

Ingunn hefur sagst mundu fjárfesta í listum og menningu. Fyrir skemmstu keypti hún svokallað Alliance-hús að Grandagarði sem hún hyggst nýta undir listastarfsemi. Um bæði þessi hús gildir að ytra byrði þeirra er friðað.

.