Viðsnúningur í rekstrinum

Hagnaður Vinnslustöðvarinnar fyrstu þrjá mánuði ársins nemur 765 milljónum króna, samkvæmt uppgjöri sem birt var í gær. Breytingin frá sama tíma í fyrra er mikil, en þá nam tap 213 milljónum króna.

Heildartekjur tímabilsins voru 1.750 milljónir króna en 1.769 milljónir í fyrra. Tekjur fiskvinnslu stóðu nánast í stað en tekjur útgerðar jukust. Rekstrargjöld lækkuðu um 200 milljónir króna, úr 1.359 milljónum í fyrra í 1.159 milljónir.

Hagnaður fyrir afskriftir og fjármagnsliði nam tæplega 592 milljónum króna, jókst um 44 prósent milli ára. Meðal tekna er færður söluhagnaður af aflaheimildum að upphæð 33 milljónir króna.