Dansað við Geir Waage

Á nýafstaðinni prestastefnu var eitt mesta hitamál samtímans, er varðar jöfn mannréttindi öllum þegnum samfélagsins til handa, tekið fyrir. Einn dagur var tekinn undir umræðuna um málefni hjónavígslu/vígslu eða blessunar samkynhneigðra para innan kirkjulegs samfélags.

Kirkjan hefur haft mörg ár til þess að vinna í þessu máli. Það var þó ekki fyrr en 6. september 2004, þegar skýrsla á vegum forsætisráðuneytisins um réttarstöðu samkynhneigðra kom út, að þjóðkirkjan var formlega beðin um að vinna þetta mál innandyra. Orðrétt segir í skýrslunni: „Nefndin hvetur þjóðkirkjuna til þess að breyta afstöðu sinni gagnvart hjónaböndum samkynhneigðra þannig að samkynhneigðir geti fengið kirkjulega vígslu eins og gagnkynhneigð pör. Slík afstöðubreyting er að mati nefndarinnar forsenda þess að unnt verði að breyta hjúskaparlöggjöf í þessa átt.“

Innan lútherskrar kirkju á Íslandi eru nú 43 guðfræðingar, 42 prestar og 1 fræðimaður, sem skrifa undir tillögu þess efnis að hvetja eigi hið háa Alþingi til þess að samræma hjúskaparlög og lög um staðfesta samvist, þannig að vígslumönnum verði heimilt að annast hjónavígslu samkynhneigðra. Þetta eru einungis þau okkar sem treysta sér til þess að taka afstöðu opinberlega. Þess vegna skipti það sköpum á prestastefnu að ósk okkar um leynilega atkvæðagreiðslu var hunsuð. Ekki voru allir aðilar tillögunnar staddir á prestastefnu og auk þess hafa fimm prestar lútherskra fríkirkna ekki atkvæðisrétt á þeirri virðulegu samkomu.

Ég hvet hugsandi almenning til þess að óska eftir samræmingu ofangreindra laga, þannig að réttarstaða verði raunverulega jöfn, óháð kynhneigð! Ef þjóðkirkjan er ekki tilbúin, skulum við ekki láta samfélagið gjalda þess, því breytingar þurfa að verða á.

Það er einlæg trú mín að öll boðun Jesú Krists, frelsara okkar, sé með mannréttindum allra Guðs barna. Hjónaband er ekki einungis stofnun um barneignir, því þá væru hjónabönd eldra fólks og barnlauss ógild.

Eftir erfiðan dag á prestastefnu var snætt og stiginn dans. Vil ég sérstaklega þakka sr. Geir Waage ánægjulegan dans við undirleik þeirra Jóns Helga og Einars.

Höfundur er fríkirkjuprestur í Reykjavík.