Norska fjármálaeftirlitið fettir fingur út í Kaupþing

Kredittilsynet, norska fjármálaeftirlitið, varar við því að Kaupþing eignist meira en fimmtungshlut í fjármálafyrirtækinu Storebrand og óttast um stöðu félagsins ef Kaupþing auki hlut sinn. Þetta kemur fram í skýrslu frá stofnuninni sem Dagens Nærlingsliv greinir frá.

Kaupþing er stærsti hluthafinn í Storebrand með áætlaðan sextán prósenta hlut sem metinn er á um 44 milljarða króna.

Stofnunin segir að Kaupþing skorti reynslu af tryggingingarekstri sem meginstarfsemi Storebrands byggist á, skorti eigið fé og sé of áhættusækinn. Þá hefur hún áhyggjur af bankinn sé viðkvæmur gagnvart skakkaföllum í brothættu íslensku hagkerfi.

Kaupþing hefur heimild til að eignast allt að fimmtungshlut í Storebrand, rétt eins og norska vátryggingafélagið Gjensidige, en hafði óskað eftir leyfi að eignast fjórðungshlut sem eftirlitið hafnaði. Að mati fréttaskýrenda er afstaða Kredittilsynet talin styrkja stöðu Gjensidige ef til yfirtöku kemur.

„Við erum ekki sammála norska fjármálaeftirlitinu og teljum að niðurstöður þeirra séu ekki byggðar á traustum grunni," segir Jónas Sigurgeirsson, forstöðumaður samskiptasviðs Kaupþings í samtali við Fréttablaðið. Jónas gefur lítið fyrir meint reynsluleysi Kaupþings af tryggingarekstri og bendir á að bankinn hafi tekið þátt í vátrygginga, eigi KB Líf og í stjórn bankans sitji forstjóri eins stærsta tryggingafélags Svíþjóðar.

Talið er að tilgangur fjárfestingar Kaupþings í Storebrand sé öðrum þræði sá að eignast hlutabréf í öflugu fjármálafyrirtæki á góðu verði fremur en að taka félagið yfir. Á fundi stjórnenda bankans með markaðsaðilum í Lundúnum á dögunum kom fram að fjárfestingargeta Kaupþings sé um 270 milljarðar króna sem er sama fjárhæð og markaðsvirði Storebrands.

Viðbrögð norska fjármálaeftirlitsins koma ef til vill ekki á óvart.

Reuters-fréttastofan bendir á að sögulega séð hafi ítök ríkisins verið sterk í norsku athafnalífi og oft hefur stjórnvöldum tekist að koma í veg fyrir að erlendir fjárfestar tækju yfir norsk fjármála- og iðnaðarfyrirtæki. Kaupþing er því ekki eitt um að fá móttökur sem þessar.