Þeir bestu fá eina og hálfa milljón króna á mánuði

Anders Dahl-Nielsen, framkvæmdastjóri Skjern, segir launin í danska handboltanum hafa hækkað mikið síðustu ár. Verðmiði leikmanna hefur einnig hækkað verulega. Karlarnir eru loksins komnir í sama launaflokk og konurnar.

Flestir íslenskir handboltaáhugamenn þekkja Anders Dahl-Nielsen. Hann spilaði og þjálfaði KR leiktíðina 1982-83 þar sem hann fór mikinn ásamt Alfreð Gíslasyni. Hann hefur síðar komið víða við á ferlinum og meðal annars þjálfaði hann Flensburg í fimm ár. Hann tók síðan við Skjern en eftirlét Aroni Kristjánssyni starfið fyrir nokkrum árum og gerðist framkvæmdastjóri félagsins.

Líkt og Aron yfirgefur hann herbúðir Skjern í sumar en hann mun þá taka við framkvæmdastjórastöðunni hjá þýska stórliðinu Flensburg.

Yfir tíu Íslendingar hafa verið að spila í danska boltanum í vetur en hann er á hraðri uppleið. Ein ástæða þess er aukið fjármagn sem komið er inn í boltann. Virðist danska deildin geta keppt við þýsku og spænsku deildina í dag að stóru leyti.

„Það hefur verið hröð þróun í danska handboltanum og miklir peningar komnir í hann. Bæjarfélög hafa verið að nota handbolta- og fótboltafélög til að kynna sig og fyrirtæki í bæjunum taka virkan þátt í þeirri herferð,“ sagði Anders Dahl við Fréttablaðið í gær.

Hann segir að önnur stór ástæða sé sú að fótboltafélögin séu farin að taka yfir handboltadeildirnar í stóru borgunum. Það sé hagkvæmt fyrir báðar deildirnar og ekki síst handboltann sem fær sterka markaðsmenn í sín lið.

Anders Dahl segir marga í Danmörku óttast að þessi þróun sé of hröð og að sum lið séu að tefla einum of djarft í samkeppninni.

„Launin hafa hækkað samhliða þessari þróun og fyrir vikið eru að koma sterkari leikmenn í deildina. Leikmenn eru jafnvel að koma frá Þýskalandi eins og Snorri Steinn Guðjónsson og Ásgeir Örn Hallgrímsson. Danska deildin getur kannski ekki keppt við bestu liðin í Þýskalandi og Spáni en er vel samkeppnishæf við liðin sem koma þar á eftir,“ sagði Anders Dahl.

Annað sem laðar íþróttamenn til Danmerkur er hinn svokallaði „prófessoraskattur“. Afburðaíþróttamenn falla undir þennan skattlið og greiða því aðeins 33 prósenta skatt í stað 63 prósenta eins og hinn almenni borgari.

Þessara réttinda njóta íþróttamennirnir í þrjú ár en aðeins þeir sem hafa yfir 700 þúsund krónur í mánaðarlaun eiga rétt á þessum skattfríðindum.

Danskur kvennahandbolti er geysilega vinsæll og danska deildin er sú besta í heimi. Anders Dahl segir dönsku liðin geta fengið hvaða leikmann sem er í kvennaboltanum.

Konurnar hafa hingað til verið með mun hærri laun en strákarnir og það er fyrst núna sem karlmennirnir fá sömu laun og konurnar.

„Það er talið að bestu handboltakonurnar hafi fengið tæplega eina og hálfa milljón króna í mánaðarlaun á meðan bestu karlarnir fengu aðeins tæplega milljón.

Þeir allra bestu eru loksins farnir að sjá sömu tölur og konurnar núna þótt þær séu almennt að gera það betur en karlarnir,“ sagði Anders Dahl. henry@frettabladid.is