Skrefi frá peningalausu hagkerfi

Nýráðinn forstjóri MasterCard á Íslandi boðar útrás og breytingar. Haukur Oddsson var í viku­byrjun ráðinn forstjóri Borgunar hf., helsta samstarfsaðila MasterCard á Íslandi, og tekur við af Ragnari Önundarsyni sem gegnt hefur starfinu í níu ár.

Haukur segir við mikilli uppstokkun á kortamarkaði að búast og haldi þar áfram breytingar sem þegar hafi orðið, svo sem á eignarhaldi og með færslu útgáfu greiðslukorta úr rekstrinum. Hann segir starfsvettvanginn spennandi enda kortanotkun óvíða meiri. „Hér er nánast peningalaust þjóðfélag, bara hálft prósent af þjóðarframleiðslunni í umferð sem peningar, meðan hlutfallið er til dæmis sjö til átta prósent í Sviss.“

Breytt umhverfi og ný verkefni segir hann því ráða mannaskiptunum. „Óhætt er að segja að þessar breytingar tengjast ekki rannsókn samkeppnisyfirvalda á þessum markaði á nokkurn hátt,“ segir hann, en á þeim vettvangi stendur enn yfir rannsókn sem hófst síðasta sumar. Meðal breytinga sem séu að verða segir Haukur aukna áherslu á útrás.

Sóknarfærin eru að sögn Hauks mörg enda starfsemi kortafyrirtækjanna hér mun metnaðarfyllri en þekkist erlendis. „Gjöld sem hér eru greidd af bæði verslunum og af kort­höfum eru til dæmis með því allra lægsta sem þekkist.“