Icelandair semur við Air Malta

Icelandair Group hefur gert samning við Air Malta upp á rúman milljarð króna. Í tilkynningu félagsins kemur fram að LatCharter Airlines, dótturfélag Loftleiða Icelandic, hafi gert samning við maltneska ríkisflugfélagið Air Malta um leigu á einni Airbus A320 þotu til tveggja ára.

„Airbus þotan, sem áður var í rekstri hjá Air Canada, verður sú þriðja sem bætist við flota LatCharter á þessu ári. Fimm þotur verða þar með í rekstri hjá LatCharter Airlines. LatCharter tekur þoturnar á leigu frá bandaríska flugvélaleigufyrirtækinu KJ Aviation,“ segir í tilkynningur Icelandair Group.

Loftleiðir, sem er eitt dótturfélaga Icelandair Group, eignuðust LatCharter Airlines á miðju síðasta ári. Félagið hafði þá tvær Airbus þotur í rekstri. „Sá floti hefur vaxið um 150 prósent með þessum samningi,“ segir félagið, en gert er ráð fyrir að floti félagsins vaxi enn frekar á næstunni.

Haft er eftir Valery Litanski rekstrarstjóra LatCharter að ánægjulegt sé hversu vel hafi tekist til við innleiðinguna á nýju þotunum.

Sigþór Einarsson stjórnarformaður LatCharter og Loftleiða-Icelandic segir góðan áfanga hafa náðst í markaðssókn félagsins sem lagt hafi verið upp í með kaupunum á LatCharter Airlines. „Meginmarkmið með þeim kaupum var að breikka vöru- og þjónustuframboð Loftleiða-Icelandic á sviði alþjóðlegra flugvélaviðskipta. Það er ánægjulegt að sjá að þessi stefna okkar er að skila árangri hraðar en björtustu vonir stóðu til,“ er eftir honum haft í tilkynningur Icelandair Group.