Með gott fjárfestinganef

Bala Murughan Kamallakharan er meðlimur í viðskiptaþróunarteymi Glitnis sem gegnir því mikilvæga starfi að leita og vinna að fjárfestingartækifærum fyrir bankann. Þegar teymið hefur fundið réttu færin og bankinn hefur keypt nýtt fyrirtæki stýrir það samþættingarvinnunni sem fylgir í kjölfarið.

Ólympíuleikarnir í Aþenu sumarið 2004 voru miklir áhrifavaldar í lífi Bala. Þar var hann staddur ásamt Esther Ágústu Berg, eiginkonu sinni, til að styðja við bakið á bróður hennar, Sigfúsi Sigurðssyni handboltakappa. Glitnir var styrktaraðili íslenska handboltalandsliðsins á leikunum og því var Bjarni Ármannsson, forstjóri Glitnis, einnig á svæðinu. Þeir Bjarni hittust því á leikunum og fóru að spjalla saman. Líklegast hefur Bjarna þótt bakgrunnur Bala eiga vel við í alþjóðastarfsemi bankans. Hann hefur mastersgráðu bæði í tölvunarfræði og hagfræði og hafði um alllangt skeið unnið hjá ráðgjafarfyrirtækinu Ernst & Young í Houston í Bandaríkjunum, bæði við ráðgjöf og kerfisinnleiðingu. Í lok árs árið 2005 hittust þeir Bjarni aftur í Washington og bauðst Bala í framhaldi af því vinna í viðskiptaþróun Glitnis. Í upphafi árs 2006 fluttu hjónin því frá Bandaríkjunum, þar sem þau kynntust fyrst og höfðu búið um árabil, til Íslands.

Fjórða stærsta hagkerfi heimsBala er Indverji og bjó þar uns hann hélt vestur um höf til að leita sér menntunar. Flestir eru sammála um að vert sé að fylgjast vel með Indlandi. Þær miklu efnahagsumbætur sem eiga sér þar nú stað, í bland við mikinn mannfjölda og sterkt menntakerfi, hafa haft í för með sér gríðarlegar breytingar í landinu sem ekki sér fyrir endann á. Erlendar fjárfestingar hafa aukist hratt að undanförnu og er indverska hagkerfið nú þegar það fjórða stærsta í heimi.

Ísland er enginn eftirbátur annarra þjóða þegar að þessu kemur. Hinn 26. febrúar í fyrra var íslenskt sendiráð opnað í Nýju-Delí í því miði að efla viðskiptasamband milli Íslands og Indlands. Íslensk fyrirtæki sýndu því mikinn áhuga og fóru fulltrúar 23 þeirra með í opinbera heimsókn til að vera viðstaddir opnunina og leita tækifæra.

Nokkur íslensk fyrirtæki hafa þegar umfangsmikla starfsemi á Indlandi. Má þar nefna Actavis, Eskimo Models og Promens, dóttur-félag Atorku. Enn fleiri eru í því ferli að kanna markaðinn og leita að tækifærum, bæði til fjárfestinga og beinna viðskipta. Viðskipti milli Íslands og Indlands jukust nokkuð milli áranna 2005 og 2006. Árið 2005 námu þau samtals um milljarði króna en fyrstu ellefu mánuði ársins 2006 námu viðskiptin yfir 1,4 milljörðum króna. Helstu útflutningsafurðir eru fiskafurðir, lyf og hugbúnaður en mest er flutt inn af vefnaðarvörum, matvælum, gjafavöru og lyfjum.

Tækifæri í smásölu og bankaþjónustuBala og fjölskylda hans kunna vel við sig á Íslandi. Hann hefur jafnvel aðlagast nógu vel til þess að fara út að hlaupa reglulega og segir hann kuldann ekki bíta á sér, jafnvel þótt nú sé hávetur og loftslagið talsvert ólíkt því sem er á æskuslóðum hans í Suður-Indlandi, þar sem hann bjó allt þar til hann flutti til Bandaríkjanna. Það eina sem hann hefur yfir að kvarta er tungumálafærni hans sjálfs því eitthvað þykir honum hægt ganga að ná tökum á íslenskunni.

Indland er að mati Bala nánast óþrjótandi lind tækifæra. Hann segir kostina við að fjárfesta þar marga og mun fleiri en gallana. Þeir séu vissulega til staðar en megi þó auðveldlega forðast með því að finna gott fólk til að vinna með sem hafi góða staðþekkingu. „Þarna eru heilu markaðirnir fullir af tækifærum fyrir þá sem kunna að nýta sér þá. Á Indlandi býr stærsta millistétt heims og kaupmáttur hennar eykst hratt ár frá ári.“ Hann telur að þjónusta við þennan hóp fólks sé grundvöllur fyrir velgengni á Indlandi. Sérstaklega séu smásala og bankaþjónusta óplægðir akrar. „Til þess að millistéttin geti vaxið þarf hún bankanna við.

Það eru fjölmargir bankar á Indlandi en mjög fáir þeirra einbeita sér sérstaklega að þjónustuhlutanum. Þetta kemur til af því að þá hefur aldrei skort viðskiptavini, ef einn gengur út eru alltaf tíu sem bíða við dyrnar. Í smásölunni eru jafnframt gríðarlegir möguleikar. Þar eru markaðskimar sem eru að mestu ónýttir.“