Evruhlutabréf eru rökrétt skref

Líklegt má telja að tillaga um að færa allt hlutafé Straums-Burðaráss Fjárfestingabanka úr krónum yfir í evrur verðu lögð fyrir hluthafa á aðalfundi bankans sem haldinn verður í febrúarlok eða byrjun mars.

Á morgunverðarfundi Félags Viðskiptafræðinga og hagfræðinga um gjaldmiðilsmál á Hóteli Nordica í gær kom fram í máli Friðriks Jóhannssonar, forstjóra Straums-Burðaráss, að evruskráning hlutabréfa kynni að vera eðlilegt skref í framhaldi af því að bankinn hefur fært eigið fé sitt yfir í evrur og hætt að gera upp í krónum. Breyting í þessa veru segir Friðrik að myndi styrkja bankann á alþjóðlegum fjármálamörkuðum, enda séu lánveitendur þar vanir evrum en ekki krónum og telur að þeir kunni að horfa á krónuna sem áhættuþátt.

„Það er ljóst að þetta eykur mjög líkurnar á því að við getum laðað að erlenda fjárfesta auk þess sem það eykur möguleika á sameiningum við erlend fyrirtæki að vera í evrum.“ Vísar hann meðal annars til þess möguleika að greiða fyrir smærri fyrirtæki með hlutabréfum í Straumi-Burðarási. „Með því tengjum við svo vel hagsmuni okkar og hagsmuni þeirra sem við erum að fá til liðs við okkur.“

Friðrik áréttar hins vegar að ákvörðunin um að fara þá leið að færa hlutabréf bankans í evrur sé í höndum hluthafa bankans og verði ekki tekin nema á fundi þeirra. „Og ég reikna með því að þetta verði borið upp á aðalfundi.“

Friðrik segist telja að í breytingunni felist einnig ávinningur fyrir smærri hluthafa líka jafnvel þótt viðskiptakostnaður geti fylgt því að skipta í evrur, enda muni breytingin efla bankann, auk þess sem hluthafar geti fjármagnað bréf sín í evrum og losnað þar með við gjaldeyrisáhættu vegna skammtímasveiflna.