Kaupmáttur eykst um tæp 3 prósent

Launavísitala í desember í fyrra lækkaði um 0,1 prósentustig á milli mánaða. Lækkunin skýrist af því að áhrifa gætir ekki lengur af 26.000 króna eingreiðslu sem kom til við endurskoðun kjarasamninga Alþýðusambands Íslands og Samtaka atvinnulífsins á almennum vinnumarkaði sem greidd var í árslok 2005, að sögn Hagstofu Íslands.

Hagstofan segir launavísitölu helstu launþegahópa á fjórða ársfjórðungi í fyrra hafa hækkað um 1,3 prósent frá fyrri ársfjórðungi. Launavísitala opinberra starfsmanna hækkaði um 1,5 prósent og vísitalan á almennum markaði hækkaði um 1,1 prósent.

Greiningardeild Glitnis bendir á það í Morgunkorni sínu í gær að lækkunin sé minni en sem nemi áhrifum eingreiðslunnar og hafi laun því hækkað um 0,2-0,3 prósent á milli mánaða í desember. Þetta jafngildir því að launavísitalan hafi hækkað um 9,8 prósent síðastliðna 12 mánuði á sama tíma og vísitala neysluverðs hækkaði um 7,0 prósent. Hafi kaupmáttur launa því aukist um tæp þrjú prósent á tímabilinu, að sögn greiningardeildar Glitnis.