Stefnt að skráningu Promens innan tveggja ára

Hólmfríður Helga Sigurðardóttir

skrifar

Stefnt er á að skráningu Promens innan tveggja ára. Ekki fæst upp gefið til hvaða kauphalla er helst horft til þess. Bækur félagsins verður jafnframt eftirleiðis gerðar upp í evrum. Þessar breytingar koma í kjölfar kaupa Promens á norska fyrirtækinu Polimoon sem gengu í gegn um áramótin. Atorka, sem á ríflega 82 prósent hlutafjár í félaginu, hyggst eftir sem áður spila lykilhlutverk í eignarhaldi á félaginu. Fyrir yfirtökuna var Polimoon skráð í Kauphöllini í Ósló en nú er unnið að afskráningu þess.

Það má segja að Promens hafi tekið stakkaskiptum frá því í upphafi árs 2005 þegar félagið var með tuttugu milljónir evra í veltu. Í lok árs 2006, eftir umrædd kaup á Polimoon, var veltan komin í 710 milljónum evra á ársgrundvelli. Promens rekur nú sextíu verksmiðjur í tuttugu löndum, 5.400 starfsmenn starfa hjá félaginu og 160 þúsund tonn af plasti eru framleidd árlega. Einungis tvö prósent af umsvifum Promens sér nú stað á Íslandi og félagið er orðið leiðandi í plastiðnaði á heimsvísu.

Ragnhildur Geirsdóttir, forstjóri Promens, og Arne Vraalsen, forstjóri Polimoon, kynntu á mánudag hugmyndina að baki kaupunum. Í máli Ragnhildar kom fram stjórnendur Promens sjái mikla möguleika á frekari vexti, bæði á núverandi mörkuðum, í Asíu og Austur-Evrópu. Promens var fyrir kaupin sérhæft í hverfissteypu en Polimoon er hins vegar sérhæft í framleiðslu á ýmsum tegundum umbúða, auk þess að framleiða íhluti fyrir bíla- og rafeindaiðnað. „Við vorum búin að horfa á Polimoon í nokkurn tíma og sáum það sem áhugaverðan kost sem félli vel inn í okkar stefnu.

Við sjáum þetta sem gullið tækifæri til að fara inn í aðra tækni en hverfissteypuna til að geta haldið áfram að vaxa og taka stærri skref. Félagið er með sterka stöðu í Evrópu og við sjáum fram á mjög áhugaverð tækifæri til að vaxa saman í framtíðinni.“

Verðið sem Promens greiddi fyrir Polimoon var 35 norskar krónur á hlut, sem samsvarar um 165 milljónum evra. Kaupin voru fjármögnuð með eigin fé og breytanlegum lánum sem eru sölutryggð af Atorku og Landsbanka Íslands, auk lánsfjármögnunar frá norska bankanum DnB NOR.