Vill evrópska risakauphöll

Jean-Claude Trichet, bankastjóri Seðlabanka Evrópu, segist frekar vilja að evrópska kauphallarsamstæðan Euronext sameinist Þýsku kauphöllinni, Deutsche Boerse, en Kauphöllinni í New York (NYSE). Forsvarsmenn Euronext hafa nú þegar tilkynnt að sameining við NYSE sé í burðarliðnum.

Ég er Evrópumaður og fyndist eðlilegra að tvær evrópskar kauphallir tækju saman höndum. Ég kem hins vegar hvergi nærri þessari ákvörðun, sagði Trichet.

Verði úr sameiningu NYSE og Euronext verður til stærsti hlutabréfamarkaður heims og sá fyrsti sem nær yfir tvær heimsálfur.

Forsvarsmenn Deutsche Boerse segjast ekki ætla að láta deigan síga og hyggjast reyna til þrautar að landa samningum við Euronext. Líklegast verður þó að telja að sameining NYSE og Euronext verði að veruleika.

Euronext hefur höfuðstöðvar í París og rekur kauphallir í Amsterdam, Brussel og Lissabon, auk þess að koma að rekstri kauphalla í Madríd og Mílanó.

Mikil sameiningarhrina er nú á hlutabréfamörkuðum víða um heim og freista forsvarsmenn kauphalla þess að lækka stofnkostnað. Fréttir hafa borist af yfirvofandi sameiningu NASDAQ í New York og Kauphallarinnar í Lundúnum en ekki hefur náðst samkomulag enn.