Glitnir spáir 1,8% verðbólgu

Glitnir gerir ráð fyrir 1,8% verðbólgu yfir næsta ár í nýrri spá en hafði áður spáð 3,2% verðbólgu. Óvissan í spá Glitnis vegur þó töluvert meira til hækkunar fremur en til lækkunar, segir í Morgunkorni Greiningar bankans.

Glitnir reiknar með að yrirhugaðar aðgerðir stjórnvalda til að lækka matvöruverð leiði til 2,7% lækkunar vísitölu neysluverðs, en telur þó líkur á að stjórnvöld hafi ofmetið áhrif fyrirhugaðra aðgerða og verðbólgan framundan sé því vanmetin.

Í forsendum verðbólguspár Glitnis er einnig gert ráð fyrir nokkurri lækkun á íbúðaverði. Líkurnar á slíkri lækkun virðist þó fara minnkandi um þessar mundir í ljósi vilja stjórnvalda til að bjóða aftur 90% lán á vegum Íbúðalánasjóðs, miða lánshlutfall við kaupverð í stað brunabótamats og hækka hámarkslánið. Einnig virðist draga hægar úr þenslu í efnahagslífinu um þessar mundir en áður var talið og styður það við eftirspurnarhliðina á íbúðamarkaðinum, segir bankinn.

Þá segir í Morgunkorni, að greiningardeildir bankanna hafa birt nýjar verðbólguspár á síðustu dögum í kjölfar þess að kynntar voru fyrirhugaðar aðgerðir ríkisstjórnarinnar. Spárnar hafi gert ráð fyrir 0% til 2,4% verðbólgu yfir næsta ár. Glitnir telur litlar líkur á að lægsta spáin gangi eftir en um leið þokkalegar líkur á að hæsta spáin gangi eftir og verðbólgan geti raunar hæglega orðið umtalsvert meiri en sú spá gefur til kynna. Stærsti óvissuþáttur í verðbólguspánni er sem fyrr gengisþróun krónunnar, en hún ræðst að stórum hluta af áhættufælni alþjóðlegra spákaupmanna, vaxtastiginu og þenslu í hagkerfinu, segir í Morgunkorni Glitnis.