Bruce stendur enn með Pennant

Steve Bruce, stjóri Birmingham, segir að þó hann kjósi enn að styðja við bakið á Jermaine Pennant, hafi hann ekki endalausa þolinmæði í garð leikmannsins sem hefur verið duglegur við að koma sér í vandræði.

Pennant lenti í vandræðum á klúbbi í vikunni og hefur margoft áður komið sér í vandræði á stuttum ferli sínum sem knattspyrnumaður. "Ég hef aldrei áður á mínum ferli verið með vandræðagemling í liði mínu, en um leið og ég fékk símtalið vegna Pennant á dögunum, grunaði mig að það væri hans vegna. Ég hef kosið að standa við bakið á honum hingað til, en ég hef ekki endalausa þolinmæði og hann verður einfaldlega að fara að ákveða hvort hann ætlar að nýta hæfileika sína sem knattspyrnumaður eða kasta því öllu á glæ með fíflagangi. Ég vil að leikmenn mínir séu í fréttunum vegna hæfileika sinna, ekki vegna vandræða í einkalífinu," sagði Bruce.