Búist við hörðum slag um Delta

Jón Aðalsteinn Bergsveinsson

skrifar

Flugfélög í Bandaríkjunum búast við hörðum slag verði eignir seldar undan bandaríska flugfélaginu Delta.

Delta hefur átt við mikla rekstrarörðugleika að stríða og fóru stjórnendur félagsins fram á greiðslustöðvun á síðasta ári. Fyrir um mánuði síðan gerði bandaríska flugfélagið US Airways 8 milljarða dala óvinveitt yfirtökutilboð í Delta en það svarar til um 566,8 milljarða íslenskra króna. Verði af samruna verður til eitt stærsta flugfélag í heimi.

US Airways er sjöunda stærsta flugfélag Bandaríkjanna en hjá því starfa 35.000 manns. Delta er hins vegar þriðja stærsta flugfélag landsins með 47.000 starfsmenn.

Í kjölfar þess að yfirtökutilboðið var lagt fram í nóvember greindi Gerald Grinstein, forstjóri Delta, og aðrir stjórnendur flugfélagsins, frá því að þeir ynnu að því hörðum höndum að koma í veg fyrir að hluthafar Delta taki tilboði US Airways. Þá segjast þeir enn fremur vera að vinna að því eftir fremsta megni að vinna stuðning lánadrottna, því þörf væri á stífri hagræðingu í rekstri flugfélagsins til að forða því frá gjaldþroti.

Hvað sem verður er reiknað með að eignir flugfélagsins verði seldar frá því í hagræðingarskyni á helstu flugvöllum vestanhafs fyrir allt að 8,6 milljarða bandaríkjadali eða um 600 milljarða íslenskra króna.

Paul Tate, fjármálastjóri bandaríska lággjaldaflugfélagsins Frontier, segir harða baráttu um eignirnar fram undan.

Tate segir Frontier ætla að fylgjast grannt með þróun mála og séu líkur á að félagið festi sér einhverjar eignir, sér í lagi þær sem verði seldar á vesturströnd Bandaríkjanna.

„Ef einhverjar eignanna höfða til okkar þá munum við kanna málið. En við vitum að önnur flugfélög horfa á sömu eignir,“ sagði Tate og lagði áherslu á að hart yrði barist um eignir Delta.