Engar breytingar á Úrvalsvísitölunni

Engar tilfærslur urðu á félögum inn eða út úr nýrri Úrvalsvísitölu fyrir tímabilið 1. janúar til 30. júní á næsta ári. Sömu fimmtán félög og skipuðu eldri Úrvalsvísitölu sitja því sem fastast áfram.

Tvisvar á ári eru tólf til fimmtán félög valin inn eftir ákveðnum reglum sem byggjast á gögnum um viðskipti frá 1. desember árið 2005 til 30. nóvember í ár.

Kaupþing banki hefur mesta vægi allra félaga í vísitölunni, að 34 prósentum, en bæði Landsbankinn og Glitnir hafa rúmlega fjórtán prósenta vægi.

Fyrirfram hafði greiningardeild Kaupþings reiknað með að Icelandic Group tæki sæti Atlantic Petroleum en sú varð ekki raunin.