Skora á Sturlu að beita sér fyrir því að hvalveiðar verði stöðvaðar

Hvalaskoðunarsamtök Íslands skora á Sturlu Böðvarsson, samgönguráðherra og ráðherra ferðamála, að hlutast til um að hvalveiðar verði stöðvaðar og málið tekið upp að nýju innan ríkisstjórnarinnar. Þetta kemur fram í tilkynningu frá samtökunum í dag.

Þar fordæma samtökin ákvörðun sjávarútvegsráðherra að heimila veiðarnar og fara þau fram á að málið verði skoðað út frá heildarhagsmunum þjóðarinnar en ekki út frá ímynduðum hagsmunum útgerðarfyrirtækja eins og það er orðað.

Benda þau á að sjávarútvegsráðherra hafi ekki haft samráð við hagsmunaaðila í ferðaþjónustu líkt og eðlilegt hefði verið áður en ákvörðunin var tekin og áhyggjuefni sé að samgönguráðherra hafi ekkert aðhafst til að verja hagsmuni ferðaþjónustunnar annað en að leggja til enn meiri fjárútlát til að kynna og réttlæta hvalveiðistefnu sjávarútvegsráðherra.

Þá draga Hvalaskoðunarsamtök Íslands í efa að 44.000 hrefnur sé að finna hér við land og segja að á undanförnum þremur árum hafi æ færri hrefnur sést á sumum hvalaskoðunarsvæðum og gæfum dýrum hafi fækkað. Hrefnuveiðarnar hafi því þegar haft skaðleg áhrif á hvalaskoðun og dregið úr upplifun ferðamanna.