Laun knattspyrnumanna lækka

Laun knattspyrnumanna í ensku úrvalsdeildinni lækkuðu í fyrsta skipti milli ára, samkvæmt árlegri knattspyrnuskýrslu endurskoðunarfyrirtækisins Deloitte & Touche. Lækkunin nam þremur prósentum en áður höfðu laun hækkað um tuttugu prósent á ári að meðaltali frá stofnun deildarinnar. Skýrslan tók til tímabilsins 2004 til 2005.

Enska úrvalsdeildin ber sem fyrr höfuð og herðar yfir aðrar knattspyrnudeildir Evrópu. Tekjur úrvalsdeildarliðanna námu alls tæpum 180 milljörðum íslenskra króna. Manchester United var tekjuhæsta liðið með tæplega 22 milljarða króna tekjur.

Tekjur liða í ítölsku Serie-A deildinni námu alls tæpum 124 milljörðum króna. Tekjur af þýsku Bundesligunni voru tæplega 110 milljarðar króna og um 96 milljarðar af spænsku fyrstu deildinni.

Athygli vakti að næstefsta deild á Englandi, Championship-deildin svokallaða, var sú sjötta stærsta í Evrópu miðað við tekjur. Samtals námu tekjur liðanna 42 milljörðum króna.