Ónýt dekk lögreglubíls skorin

Skemmdarvargur stakk göt á öll dekk lögreglubíls á Höfn í Hornafirði í fyrrinótt þar sem bíllinn stóð á verkstæði. Til stóð að setja ný dekk undir bílinn á verkstæðinu þar sem þau gömlu voru orðin slitin og því var um afar mis­lukkað skemmdarverk að ræða.

Lögreglan á Höfn ætlar þó ekki að leyfa kauða að komast upp með brotið og hyggst reyna að hafa hendur í hári hans. Lögreglan biður viðkomandi að gefa sig fram og leita sér aðstoðar, því athæfi af þessu tagi beri vott um alvarlega skemmdarfýsn.