Húsfyllir í Háskólabíói

Færri komast að en vilja á tónleika píanóleikarans Víkings Heiðars Ólafssonar sem leikur með Sinfóníuhljómsveit Íslands. Uppselt er á tónleikana í kvöld og engar ósóttar pantanir í boði en þess má geta að húsfyllir varð einnig á nýafstöðnum afmælistónleikum Karlakórsins Fóstbræðra fyrr í vikunni.

Fyrirhyggjusamir tónlistarunnendur fá notið efnisskrár kvöldsins og tónsmíða Beethovens og Brahms undir stjórn Rumons Gamba í Háskólabíói en aðrir áhugasamir verða að láta sér nægja útsendingu Rásar 1 frá tónleikunum sem hefst kl. 19.30.

Á hinn bóginn er nóg af spennandi tónleikum fram undan því um helgina halda félagar úr Sinfóníunni sína þriðju tónleika í kammertónleikaröð þeirri er kennd er við Kristal. Tónleikarnir fara fram í Listasafni Íslands og mun fríður flokkur hljóðfæraleikara flytja verk eftir Astor Piazzolla, Steve Reich og André Jolivet í safninu undir stjórn Eggerts Pálssonar á laugardaginn.

Á döfinni eru einnig hinir sívinsælu kvikmyndatónleikar Sinfóníuhljómsveitar Íslands. Þrjár þöglar myndir verða sýndar á bíódögum sveitarinnar sem hefjast að viku liðinni. Hin fyrsta er kvikmyndin Intolerance, sem var gerð árið 1916 en efniviður hennar er sóttur í fjögur söguleg tímabil sem öll fjalla um hörmulegar afleiðingar af óþoli mannsins: Babýlon til forna, krossfesting Krists, Frakkland miðalda og Bandaríkin í byrjun 19. aldar. Bandaríska tónskáldið Carl Davies samdi tónlistina við myndina.

Annan laugardag er síðan komið að Charles Chaplin að heilla bíógesti en tvær kvikmynda hans verða á dagskrá, The Kid og Idle Class. Chaplin samdi sjálfur tónlist við kvikmyndir sínar þótt hann læsi ekki nótur.

Hljómsveitarstjóri á bíódögum er Frank Strobel frá Þýskalandi sem hefur sérhæft sig í að stjórna flutningi tónlistar við undirleik þögulla mynda.

Nánari upplýsingar um dagskrána er að finna á heimasíðunni www.sinfonia.is.