Ballack fer til Chelsea vegna peninganna

Uli Hoeness hjá Bayern Munchen segir að ef Michael Ballack kjósi að ganga til liðs við Chelsea í sumar eins og allt útlit er fyrir, sé það aðeins vegna þess að hann sé að eltast við peninga.

"Í mínum huga hefur það alltaf verið augljóst að Michael er ekki að hugsa um að fara til annars lands til þess að kynnast menningunni eða læra nýtt tungumál - hann vill fara þangað til að kynna sér nýja gjaldmiðla. Þetta er bara vegna peninganna," segir Hoeness, sem þó segist ekki erfa það við Ballack þó hann vilji breyta til eftir fjögur ár hjá Bayern.

"Ég óska honum alls hins besta í framtíðinni, en hann hefði átt að vera heiðarlegur við okkur og viðurkenna að hann væri bara að fara frá félaginu vegna peninganna."